Bunt bemalter Sülzfisch

Anno domini 1548 aúf den 25 tag janúaren hat mich der kochmaister simon, des graffen von leúchtenbergs koch, lernen, sultzfisch machen wie nachfolgt Erstlich hat er genomen ain hecht von 2 pfúnd vnnd hat jn geschonden vnnd hat jberzwerch klaine schnitzlen dareinthan vnd zú stúcken gemacht/ hat sonst aúch ain schissel mit súltz gemacht/ 2 ferchelen von ainem pfúnd/ hats am rúcken ain wenig herabgeschinten, darnach hat ers fein aúffgesetzt, das der kopf vnnd der schwantz jst aúfgestanden, vnnd hats gesotten/ hat ain wasser jn ainer pfannen jberthan/ hats lassen sieden, hats aúch gesaltzen, hat aúch ain wenig ain essich jber die forchine geschitt, hat darnach die forchine jn die brie gelegt, das die brie woll dariber jst gangen, hats darnach lassen sieden/ man múß aber nit zú fast sieden, sonst landt sý sich nit aúffsetzen, sý werden gar blaú/ vnnd soll die forchine 3 stúnd jn der brie stan lan/ darnach sý aúff ain zinin teller legen/ er hat darnach den hecht gethan jn ain pfannen, hat ein wenig ain saltz daran gethan vnnd 2 masß neckerwein vnnd hats lassen sieden, hat darnach ain wenig mer als ain quertlin von haúsenplaterwasser daranthan, aúch ain saffera, pfeffer, zúcker, wie vill aines yeden gúttúnckt, hats fein gemach lassen sieden ob ainem klainen feúr/ vnnd den faim mit ainem faimleffel herabthan, darnach die brie jn ainen haffen gesigen vnnd den hecht jn ain schissel gelegt/ vnnd die brie durch ain wúllin sack oder stramin 3 mal lassen dúrchlaúffen, das sý fein lauter werd, darnach an die hecht geschitt, aber die schissel nit gar voll, also gestan lan bis an den andern tag/ darnach hat er genomen ain schissel, darein hat er die 2 ferchelen gethan vnnd hat ain brie von den sultzfischen aúch dareingeschit bey 2 finger, nit voll villen/ aúch soll man ain gútail brie behalten bis den andern tag/ darnach macht mans weisß, gelb, braún, schwartz, gren wie nachfolgt, erstlich die weisß farb macht man also/ man stosts ain mandel klain vnd mit haúsenplatterwasser dúrchtriben, das jst die weisß farb, darnach die weisß farb nemen vnnd gilben, so jst sý gelb, darnach nempt man trysolita, das jst ain braún diechlin, vnnd das diechlin jn haúsenblaterwasser gelegt vnnd aústrúckt, so wirt sý braún/ die schwartz farb macht man also/ man múß ain rúckin brot nemen/ vnnd ob ainem rost woll praten, darnach zu búlffer stossen vnnd mit ainem haúsenplaterwasser dúrchtreibenn, so wirts schwartz/ darnach nempt ain handtúol spinet/ oder mangoldtkraút vnnd stos jn ainem morser vnnd treibs mit haúsenblater dúrch, so wirt sý gren, darnach schick zú ainem maller vnnd last eúch mit den finff farben jn die schissel mallen, da kain fisch jn jst, was jr wend, wappen oder gewex, man mags als woll essen, es múß aber die súltz vor gestanden sein/ ee mans dareinmalt/ darnach, wan dareingemalt jst/ was jr welt haben, aúch búchstaben, so setzt die 2 forchine fein darein/ vnnd die jberbliben brie, die jr jber habt glassen, giest darjber, bis die schissel voll jst nach eúrem gefallen/ vnnd lasts gestan, so jst sý beraitt.