Gefüllte Weißbrotrinden, im Ofen gebacken

Ein andere form weißbrot. BEreit ein zeug wie zuvoꝛ, brot allein, oder Mandel darunter, wie du es am anfang haſt, in der maß alß zu den ſchnitten, nimb weiß brot, die ortbrote oder rinden ſind am beſten, ſchneid ein ſchnitten oben herab, darnach hoͤle die broſamen herauß, das nichts bleibe dann die rinde, klopffe Eyer wol, ſaltz es gar wenig, leg das brot darein, kehre es jmmer vmb, damit es lind werde, vnd nicht zu weiche, oder in halb Roſenwaſſer vnnd dem gelben allein, bald ein wenig durch gezogen, fuͤlle den zeug darein, nicht gar zu voll, mache die ſchnitten, ſo du zuvor herab geſchnitten, daruͤber, heffts mit Zimmetſpicklein zu, oder ſonſt hoͤltzlein, leg es inn ofen, es iſt beſſer dann die pfanne, du kanſt oder magſt es wol mit Eyern beſtreichen oder begieſſen, vnnd im ſchmaltz bachen, aber diß iſt beſſer, allein daß mans recht treffe, daß es nicht auffſpringe: Es iſt den krancken gut vnnd geſund, es ſol auch kalt ſeyn. Aber ein zeug, wie du hievoꝛ von wecklein haſt, diſen auch alſo eingefuͤllt, magſtu bachen, wie ſichs dir am beſten ſchickt, vnnd vber dieſelben ein gute bruͤhe machen: vnd dieſelbe magſtu auch laſſen kalt werden, wann du wilt, vnnd darnach zerſchneiden, vnd Guͤldeneſchnitten bachen. Es iſt am beſten vnden am boden eingefuͤllt, wie du hernach findeſt.