Kleine und große Vögel mit Äpfeln und Safran

Ein faſt gut Eſſen von kleinen vnd groſſen Voͤgeln, ſonderlich wann ſie alt ſeynd. NJmb die Voͤgelein, ſo man Spießvoͤgelein heiſt, als Fincken vnd dergleichen, bereit vnd waſch ſie ſauber auß, thu halb Wein vnd Waſſer daran, vnnd laß einen wall th un darnach wirffs in heiß Schmaltz, machs braun, vnder deſſen ſchaͤle ſuͤſſe Aepffel, oder andere die ſo hart ſind, daß ſie nicht leichtlich zu einem Brey werden: Du magſt auch wol Birnen nemen, die gar ſuͤß vnd geſchlacht ſind, ſchneits wie Ruben, nit groͤſſer, wirffs darnach ins heiſſe Schmaltz, vnd machs ſchoͤn Braun, nach demſelben einwenig weiß brot, thu den Zeug allen miteinander in eine kachel die recht, vnd thu ſuͤſſe Wuͤrtz, ſampt Saffran vnd der bruͤh darin du die Voͤgel geſchupfft darzu, iſt der nit genug, mehr es mit Wein vnd Fleiſchbruͤh, laß kochen wie recht iſt, daß ſie ein bruͤhlein haben, als wann man ein zarte bruͤh von geſchnittenẽ Mandeln vnd ſolchs Zeugs machen woͤlle, thu auch Weinbeer vnnd etwas ſuͤſſes darzu, wiltu, ſo laß alſo. Du magſt es auch alſo in ein Zwifel die rund geſchnitten einmachen, auch in ein Lebkuchenbruͤhlein, auch in ein ſchwartz Naͤgelbruͤhlein oder Pfefferlein: Alſo auch mit gebehetem Brot vnnd einer Huͤnerleber, wie du von den Huͤnern findeſt, auch in gruͤnes Kraut, beſtrewe es mit Zimet, alle gattung die gelb vnd ſuͤß ſind, machs recht in dem Saltz.