Geröstetes Brotmus mit Eidotter, andere Zubereitung

Auff ein andere weiß. BEhe ein ſchnitten ſchoͤn brot auff dem roſt, wie allezeit gemeldet, genug, vnd nicht verbraͤnt, weich es in Roſenwaſſer, oder andern gediſtillierten waſſer, ſo da kuͤhlen, oder das Hertz ſtaͤrcken, oder ſonſt in einer fleiſchbruͤh, wie ſichs zutraͤgt, oder du zuvor etwan eins gegeben haſt, treib es durch, ruͤhr ein dotter eines Eyes darein, oder zween, nach dem du es gern dick oder duͤñ wilt, thu darnach mehr deſſen darein, darin du es geweicht haſt mach es recht, ſchuͤtt es aber inn heiß ſchmaltz, bereit es wie vor mit Zucker vnd Roſenwaſſer. Die mit der fleiſchbruͤh darffſtu nicht zuckern, wañ es eines nicht gern ſuͤß jſſet: Jſſet es aber gern ſuͤß, vnd ſchmaͤckt doch nicht gern Fleiſch, ſo vertreib jhm den geſchmack mit Roſenwaſſer, Zimmet, Muſcatbluͤet, oder Nuͤß vnd Saffran, nach gelegenheit. Vnnd aller diſer gattung Muͤſer magſtu mit Malvaſier oder Mandeln vnd koͤſtlichem Wein machen, den Wein fuͤr die Mandelmilch oder waſſer nemen, vnnd mit Roſenwaſſer wol brechen, oder mit Zimmetwaſſer, das mit Bugloſſen oder Endivien, auch andern hertzſtaͤrckenden waſſern diſtilliert iſt, auch Zimmet, Muſcatnuß oder Bluͤet darein, ſampt genugſamen Zucker. Diſe alle ſtaͤrcken trefflich.