Mandel-Lebkuchen-Masse auf dünnem Teig, andere Form

Ein ander form. NJmb Mandeln vnd Lebkuchenmeel, knits mit Honig vnder einander, vnd roͤſts darnach alſo mit einander in der pfannen, mach es nicht zu ſtarck: mach ein faſt guten teig mit Zucker gewuͤrtz vnd Roſenwaſſer, waͤlge jhn ſo duͤnn du kanſt, vnnd wie du wilt: ſtreich des zeuges eines meſſerrucken dick drauff, ſo breit der teig, biß auff den ranfft, beſtreich es wol mit Roſenwaſſer, beſtrew es wol mit Zim̃et vnd Zucker, daß man das vnderſt nicht ſihet, truckne es ſchnell auß, damit es roͤſch werde. Alſo mach es mit vorgenantem zeug, alß Mandeln vnd Feigen, ſampt Weinbeern, die knit darnach mit Roſenwaſſer vnd Zimmetwaſſer, biß daß du es alſo beſtreichen kanſt, bereit es dann wie vor oben. Gleich alſo magſtu es mit Mandeln allein bereiten, auch den Feigen vnd Weinbeeren. Du magſt auch wol vnder die Mandeln das gelbe vom Ey nemen: Etliche nemen das weiſſe, aber ſie werden zaͤhe.