Hühner oder Fleisch in Rotwein-Brot-Brühe, andere Weise

Ein ander weiß von geſottenen Huͤnern oder Fleiſch. HAſtu gantze Viertheil von den Huͤnern oder Kalbfleiſch gantze ſtuͤck, wie auch ander klein Fleiſch, ſo wirffs in ein Tigel mit Suppenſchmaltz oder anders, wie du es haſt machs ſchoͤn roͤßlecht, aber nicht gar braun, als were es gebachen, thu einen guten loͤffel mit Eſſig darzu, daß alſo mit einpregelt, vnder deſſen behe ſchoͤn weiß Brot, ſo vil du bedarffſt, weichs in roten Wein, treibs durch den durchſchlag, machs rechter dicke, wils zu ſtarck von dem Wein ſeyn, ſo brichs mit einer fleiſchbruͤch, wuͤrtz es mit ſuͤſſer Wuͤrtz, iſt der Wein weiß geweſt, thu Saffran darzu, wann du wilt, oder laß alſo, wiltu es gern ſuͤß haben, ſtehets bey dir, es iſt gut, oder wuͤrff wol Weinbeer darzu, alſo etwann auch Zwetzſchgen. Nun ſchuͤtte das feyſte von den Huͤnern oder Fleiſch her ab, vnd die bruͤh daran, du magſt auch wol Lebzelten reiben, vnd in einem Schmaltz mit eim wenig geriebnen Brot roͤſten, doch daß das Brot von erſt braun ſey, ehe du das Lebzelten Meel darein thuſt, nach dem du einen haſt der es eſſen ſol: Es gibt Lebkuchen vil guter Pfefferlein, laß auff beyde weg mit einander kochen, trags fuͤr, beſtrewe es wol mit Zimmet, du magſt auch wie du von Roſinlen, Weinbeer vnnd Zwetzſchgenmuͤßlein haſt, alſo zu einer bruͤh beretten, ſie dienen dem krancken ſehr wol.