Mangold oder Spinat im eigenen Saft gekocht

Anderſt. NJmb guten Mangolt oder Pinetſch gereinigt vnnd gewaſchen, wider geſchwungen, ſchneid den ziemlich klein doch nicht zu faſt, thu es inn eine Kachel mit einem heiſſen ſchmaltz, deck jhn gehebe zu, dann gibt es ſelbſten Bruͤh, daß es gar lind dariñen kocht, ſaltz vnd pfeffers, ſampt Eſſig wenig oder mehr, nach Nothdurfft, vnnd ein jedes gern jſſet, du magſt auch zu zeiten neben dem Pfeffer ein Saffran vnnd ſonſten ſuͤſſe Wuͤrtz darein thun, wiltu dann gern die Bruͤh die es gibt darvon thun, ſo du gute Fleiſchbruͤh haſt, oder ein gute Fleiſchbruͤ, ſo thu kein Schmaltz in die Kachel, biß du die Bruͤh, ſo du wilt, daran thuſt, alß dann zeugs weiter an, wie vor oben. Zu einem ſolchen Kraut magſtu von Fiſch vnd Fleiſch gebratens oder gebachens geben, was du wilt, wie du mehr Eſſen finden wirſt.