Hühnerpastete mit Pomeranzen, andere Form

Ein ander Form. BEreit obgeſchrieben Zeug von Huͤnern, oder auch Kaͤlberfleiſch, wie du es haſt, alſo daß es gereiniget vnnd ſauber, legs in Malvaſier oder andern koͤſtlichen Wein uͤber naͤcht, ſo du zeit haſt, wo nicht, ſo ſtells wol vermacht auff ein glut eine ſtund oder zwo, laß aber zu keinem ſieden kommen, nur daß die Waͤrm deſto beſſer durchziehe, vnder deſſen ſchneid auch Pomerantzen, wie vorher zu dem einmachen gelehrt, vberſeud ſie in Waſſer ſo lang als ein weiches Ey, thu ein anders daran, wiltu, ſo ſeud ſie aber wie vorher noch ein mal, darnach nimb die Huͤner vnd was es iſt, wuͤrtz es mit Zimet, Jngwer, wenig Naͤgelein, Muſcatnuß, wol jnnen vnnd aͤuſſen, ſampt eim wenig geriebnen brot, ſaltz es recht, legs inn einen bereiten Paſtetenhafen, ſtrew wol Rindern marck oder Feiſt von den Nieren, von der Haut gereiniget, geſchnitten oder gehackt, darunder vnd oben auff, lege oder ſtelle die Aepffel darzwiſchen, vnnd Zuckers genug, vermachs wol mit dem deckel, ſtells auff den ofen biß auff drey viertheil ſtund, alsdann nimbs herauß, mach ein loͤchlein wie du weiſt, geuß den Wein darein, darinnen der Zeug gelegen iſt, welche du wol bedeckt ſolt behalten, laß folgend bachen. Vnd alſo magſtu es beꝛeiten, wie du von dem Gebratens auff dem Roſt haſt, auch den Koppen. Du magſt auch eine von lautern Pomerantzẽ bereiten: Es gehoͤret fuͤr Fuͤrſten, vnnd braucht vil Zeug, dann die Aepffel muͤſſen bereit ſeyn, gleich wie zu den auffbehalten, vnd dann auch wol Safft von den friſchen Aepffeln, Datteln oder Zibeben darzwiſchen. Vnd alſo magſtu nun auch die Rinden waͤſſern, ſchneiden zu langen riemlein, oder gleich wie Rauten, nach dem ſichs begibt mit Zucker, Honig oder auch ſuͤſſem Moſt, daß du es ein gantzes jahr zu dem Gebratens kanſt ſtellen, vnd an der Koſt zu den bruͤhlein brauchen. Alſo mag man die gedoͤrten ſtoſſen, vnd etwa ein wenig an eine Koſt ſtreichen, es gibt nicht allein ein guten geſchmack, ſie dienen auch ſchwachen Maͤgen wol zu der dawung.