Ziger-Brotschnitten, in Schmalz gebacken (Brotfladen)

Ein ander gut Eſſen von Zuͤger, Brotfladen genand. NJmb abermals vorgenanten zuͤger, wie auch einen friſchen ſuͤſſen kaͤß von dem molcken wol gepreſt, bereite jhn, wie zuvor mit Eyern, Zucker vnnd Roſenwaſſer, ſie werden deſto beſſer, machs aber nit ſo duͤñ wie zun dorten, es laufft dir ſonſt ab, in der dick wie ein eingebꝛaͤnt Muß, iſt recht, thu auch Weinbeer darein, klopff Eyer nach dem du bedarffſt, ſaltz es ein wenig, alſo ſchneid auch ſchnitten von weiſſem brot, als wolteſtu Guͤldenſchnitten bachen, thu des angezeigten zuͤgers darauff, ſo weit die ſchnit iſt, herumb, in der mitte am meiſten, eines guten fingers dick, biſtu geſchickt, ſchneid am andern auch, kanſtu es nicht, ſo laß bey einem ort bleiben, aber diſen weg iſts beſſer vnnd huͤbſcher: begeuß es mit den Eyern, vnnd bache es in heiſſem ſchmaltz, vnd ſo du es nur an einem ort beſchlagen wilt, oder anderſt nicht kanſt, ſo mache es ein wenig deſto dicker, vnnd kehre daſſelbig ort von erſt in das ſchmaltz, damit das brot nicht zu hart werde ſondern ſchoͤn gelb bleibe, wie guͤldene ſchnitten, das ſchmaltz ſol zimlich wol heiß ſeyn wañ du es einlegeſt, darnach aber gemach bachen, daß es nicht zu braun werde, auch nim̃ des ſchmaltzes nicht zu vil, beſonders wann ſie nur an einem ort beſchlagen ſind, damit du allemal friſches einlegſt, vnnd wider heiß machſt, dann das ſchmaltz wirt halt muͤd. Gibs kalt vnd warm, wie du wilt, in einer Zim̃et bruͤh, oder trucken: Jn einer bruͤh gehoͤrens zũ Voreſſen oder Mittel, trucken zũ letzen, mit Zucker wol beſtrewet.