Guter Eierziger in Formen

Einen guten Eyerzuͤger oder kaͤß mach alſo. DJe gemeinſten Eyerzuͤger oder kaͤß, wie mann ſie pflegt zu heiſſen, ſollen alſo gemacht werden: Nimb 4. oder 5. zum hoͤchſten 6. Eyer zu einer maß Milch, dann wann der Eyer zu vil ſeynd, werden ſie gar feiſt, wann du aber etwas wilt drauß kochen, magſtu mehr nemen, doch vber 1. oder 2. nicht (etliche machens ſo ſtarck von Eyern, daß ſie keines preſſens bedoͤrffen, aber ich wils lieber ziemlich haben, vnnd wol trucken preſſen, damit ſie nicht lang vnnd zech ſeyn) klopff die Eyer ſo wol als es ſeyn kan, ſeige ſie durch ein ſeigepfañ in einen keſſel oder pfanne, was du haſt, wo man keinen keſſel hat, ſol es ein meſſine pfann ſeyn, klopffe die Milch darunter auch einen guten becher vol ſchuͤtmolcken, thu es vbers fewer, ruͤhrs biß es anhebt ſich zu reiſſen, ſo thu den loͤffel darauff, vnd laß jhn mit ſanfftem gleich im fewer geriñen, wie ein kaͤß, wann dann das molcken lauter wirt, ſetz jhn ab, ſpreng lauter waſſer darauff herumb, deck jhn ein weil mit einem weiſſen tuch zu, darnach heb jhn mit einem ſaubern ſchaumloͤffel herauß inn koͤrblein oder andere formen, die darzu gemacht ſeynd, ſo treufft das molcken darvon, wann du es dann wilt auff den tiſch geben, ſo kehre das vnderſt vber ſich auff die blatten, ſo kompt das gemodelt empor, alßdann ſeynd etwan moͤdel wie Fiſch, etwan wie Voͤgel vnd ander Thierwerck, daran man dann die fuͤß, klawen, ſchnaͤbel, federn, ſchuppen an Fiſchen, vnd was dann mehr iſt, verguͤlden mag. Solcher vberfluß mag auſſen bleiben, doch den krancken ſeynd die guten Goldblaͤtter gar nuͤtz bey ſolchen ſpeiſen, dieweil ſie den wind vertreiben, vnd den Grimmen wehren.