Birnentorte mit hoher Mitte, auch aus rohen Birnen

Ein Dorten von Birnen. KOche die Birnen auff alleꝛley weiß vnd wege, wie du hievor haſt, welche gattung dir gefelt, allein, ſchneids zu Schnieten wie zu eim Apffel oder Birnenmuß, darnach bereite es in den hafen alſo: Mache Jngwer, Zimet vnnd Muſcatnuß vntereinander, vnd beſtrewe den boden mit geſaͤuberten Weinbeern, darnach leg die ſchnitzen, daß alles wol bedeckt iſt, ſo beſtrew es aber, vnd widerumb ein leg Birnen, das ein mal oder drey, vnd zeuch je eine leg nach der andern vom Ranfft ein, daß es in der mitte am hoͤchſten ſey: Alßdann beſtrew es wol vnd gnug, mach es mit eim ſchoͤn geſchnitten deckel mit aller zier zu, bachs, im auffſetzen beſprengs mit Zucker. Alſo magſtus auch mit rauhen Birnen, wie du von Aepffeln haſt, bereiten, es ſollen aber gar von geſchlachten Birnen ſeyn, Speckbirnen ſind gut, vnd andere mehr, in dieſelben thu oben auff ſchmaltz, vnd wol Zucker, doch an dem ſie ſuͤß an jhnen ſelbſt ſind, ſie ſollen allzeit vnter dem deckel auch roͤſch ſeyn.