Grüner Ingwer aus Trockenware eingemacht

Grünen Jngber, oder eingemachten Jngber zůmachen. DEr Jngber, wiewol er ein frembd gewächß iſt, vnd vber Meer her, auß Arabia gebꝛacht würt, iſt er vns doch als gemeyn, das wir ſein garnahe in keiner Speiß gerahten können. Diſes Gewürtz, als vns die ſelbigen anzeigen, die ſolches in Jndia geſehen haben, kreücht weit vmb ſich in der erden mit einer knopffechtigen wurtzlen, welche allenthalben neüwe würtzlin her für ſtoſſen, gewinnt des jars wol zwey oder dꝛey mal friſche neüw gewachßne blätlin, welche dem graß faſt gleich ſeind. Diſe wurtzel ſoll faſt gemein ſein in diſer gegne, alſo, das nichts behenders gefunden werde. Würt am beſten außgegraben, wann die blätlin oder das kraut verdoꝛret. Diſe wurtzel würt gar bald von den würmen durchſtochen, darumb würt ſie mit roter erden geferbt von den Kauffleüten, damit ſolches nicht mög geſehen werden, vnd der Jngber von der anfeüchtung vñ dem erdtrich, vil gewichtiger vnd ſchwärer werde. Diſe wurtzlen weil ſie noch grůn ſeind vñ friſch, von den würmen noch nit zerſtochen, ſollen ſie in Honig od' Zucker eingebeitzt werden, Dieweil wir ſie aber nit alſo friſch haben mögen, můſſen wir den gedörten weiſſen Jngber nemmen, vnd den ſchönſten vnnd beſten außklauben, vnd wider anfeüchten vñ grůn machen, auff diſe weiß. Nim̃ den beſten ſchönſten weiſſen Jngber den du haben magſt, hetteſtu aber kein weiſſen, ſo wäſche die rot farbe, darmit der gemeyn mañ betrogen würt, herab, ſouil du wilt, mache dir ein gůte ſcharpffe laug von trůſen äſchen, die ſchütt vber den Jngber, vñ laß jn wol erweichen, biß ſich die öberſt haut ergibt, die ſchöl dann ſauber herab, vnnd reinige den Jngber wol von allen zäſerlin, vnd geüß friſche laug darüber, vnnd laß ſtehen, ſo lang biß der Jngber weich genůg würt, iſt die laug ſcharpff, ſo geſchichts deſto ehe, hab aber gůt acht, das er nit zůweich werde, vnnd alle ſeine krafft verliere, dann ſo wer er gar verderbt, darumb můſtu ſein fleiſſig warten, offt ein zehen, zwo oder dꝛey von einander ſchneiden, vnd beſehen, ob es durchweichet iſt. Wann er dann recht vnd nach deinem gůtduncken, wol durchweichet iſt, ſoltu mit einem faſt dünnen ſchꝛeibmeſſerlin, als klein vnnd dünn du es gehaben magſt, die harten äderlin jnnwendig in dem Jngber durchſtechen vñ abſchneiden, ſo würt der Jngber fein mürb. Wann er dann alſo gebeitzet iſt vnd durchſtochen, ſo geüß die laug ab, vnnd wäſche den Jngber wol mit friſchem waſſer, das ſich die laug wol abſpüle vnd herauß zogen werde, magſt jn auch wol vber nacht in einem ſolchen friſchen waſſer ligen laſſen, vnd auff den moꝛgen aber ſauber wäſchen, doch gemächlich, das die durchſtochnen zehen nit gebꝛochen werden, das mag zween oder dꝛey tag gethon werden, ſo lang, biß man ſihet das ſich die laug gar abgeſpült vnnd gar herauß gezogen, vnd das waſſer nit mehꝛ glat iſt nach der laugen. Dann ſo ſchütt den Jngber auff ein tůch, vnd laß jn wol trücknen, vnnd das waſſer daruon ſeihen, vnd wann die tůcher naß werden, ſo lege wider truckne darunder, das thů ſo lang, biß er kein feüchtigkeyt mehꝛ von ſich gibt. Magſt jn auch wol alſo trücknen auff härin ſiben, wann er dann gnůg trücknet iſt, ſo mach ein ſyrop von Zucker oder Honig, oder halb Honig vnnd halb Zucker, nach deinem gefallen, wie in den zweyen erſten Capiteln des erſten Teyls klärlich angezeigt iſt, den geüß vber den Jngber, zeücht er dann etwas feüchtigkeyt an ſich von dem Jngber, vnd würde zůdüñ, ſo můſtu jn widerumb herab ſchütten, vnnd noch ein mal ſieden, ſo lang, biß er recht vnd dick gnůg würt. Solcher eingebeitzter Jngber iſt faſt gůt vnd nützlich, zů allen gepꝛeſten vnd kranckheyten des leibs von kalter materi erwachſen, ſond'lich zů dem erkaltẽ magẽ, ſchwachen döwung, vnd dem auffſtoſſen oder vberſich riechen des magens. Dienet allem kalten vnd feüchten perſonen, ſoll inn allen hitzigen kranckheyten, als gifft geflohen werden, dann er iſt faſt hitzig, ſoll allein, wie oben geſagt iſt, zů kalten ſeüchten vnnd kalten flüſſen, vñ was erkaltet iſt, gebꝛaucht werden, würt auch nützlich den alten Mannen, welche erkalt, vnd jre mannliche krefft verloꝛẽ haben, gegeben, damit ſie erwöꝛmbt, zů jrer mannlichen ſtercke kommen. Diſer Jngber mag in einem zinen gefeß oder verglaſurten geſchirꝛ, lange zeyt gůt behalten werden, in den hültzinen fäßlin doꝛret er zůſchnell auß.