Grüne Walnüsse in Sirup einmachen

Von den vnzeytigen oder Welſchen nuſſen, wie ſie auff zweyerley weg ſollen eingemacht werden. WJe die vnzeytigen Welſchen nuß eingemacht werden, iſt faſt gemeyn vnnd jederman kundtbar, werden nicht vil zů artzneyẽ gebꝛaucht, allein zů einem luſt des abends nach dem nachtmal zů eim ſchlafftrunck geſſen, mögen auff vilerley manier zůbereit werden. Sollen abgebꝛochen werden vmb Sanct Johans tag, ehe das ſie jñwendig hart, vnd ſchalen ge- winnen, mit einem harten ſpitzigen holtz durchlöchert, vnd creützweiß durchſtochen werden. Etlich ſchölen ſie voꝛ, vnd dann in ein friſch waſſer gelegt, auff neün oder zehen tag, das ſelbige waſſer ſoll des tags ein mal oder zwey erfriſchet werden, ſo lang, biß die nuß jꝛen herben geſchmack verlieren, vnd jnen die bitterkeyt vergangen iſt, vnd dann in einen keſſel gethon, vnd gemächlich geſotten, biß ſie lind vnd mürb genůg werden, iſt aber ſonderlich acht zůhaben, das ſie nicht zůlang ſieden, vnnd gar zů einem můß werden, trückne ſie dann wol auff einem ſib, als offt gemeldet iſt, vñ beſtöck ſie mit Zimmet, Nägelin, vñ zerſchnitnen eingemachten Pomerantzen ſchölfen, mach ein Syrop darzů von Honig oder Zucker, laß jn zů rechter dicke wol ſieden. Wann du jn abhebeſt von dem feür, ſo leg die beſteckten nuß darein, laß erkalten, vnd beſchwär ſie, das ſie nicht entpor ſchwimmen. Zeücht dann der Syrop etwas feüchtigkeyt an ſich, ſo laß ſänfftigklich ob einem linden kolfeür ſieden, biß der Syrop dick genůg werde. Etlich beſtöcken die nuß nicht, vermiſchen aber gůt gewürtz, als Zimmet, Jngber, Nägelin, Muſcatnuß, Galgan, Cardomömlin vnnd Cubeben, reyn geſtoſſen, vnder den warmen Honig, vnd legen jre nuß dareyn, iſt nicht ein böſe meynung. Diſe eingemachte Nuß ſollen den magen hefftig ſtercken vnd erwörmen, mag wol ſeyn vmb deß Gewürtzs willen, werden aber gemeynigklich, als oben geſagt iſt, in groſſen herꝛlichen pancketen vñ ſchlafftrüncken, mit andern ſchleckerhafftigen Latwergen vnnd Confecten fürgetragen, vnd vnnützlich auff den vollen bauch geſtopfft, darmit billicher die armen krancken, die ſolche nicht vermögen zůbezalen, gelabet werden ſolten, dañ das ſie alſo ſchandtlich verderbt, vnd niemand zůnutz kommen.