Kleine Muskatellerbirnen in Zuckersirup

Von den kleinen Byrlin, Muſcateller Byrlin genandt, einzůmachen. VNder dem groſſen geſchlecht der Byren, welches auch täglich hefftiger zůnimpt, bey geſchickten vnd fleiſſigen Gartnern, vnd gemehꝛet würt, durch neüwe art zů jmpffen vnd pflantzen. Werden allein die aller kleineſten Byrlin, inn den Apotecken, da man etwas fleiſſiger iſt, gebꝛaucht, mit Zucker einzůmachen, vmb jres ſüſſen vnd lieblichen geruchs, vnnd gůten geſchmacks willen, Muſcateller byrlin genandt, ſeind vberauß klein, aber faſt ſüß vnd eines gůten geruchs, die ſolen alſo einmachen. Laß dir ſie abbꝛechen wann ſie recht zeitig ſeind, an einem ſchönen, hällen vnd klaren tag, wann die Sonn hefftig ſcheinet, vnnd der Mon wechßt oder zůnimpt, ſollen mit der handt abgebꝛochen werden, wie auch alles obs, das man vber jar behalten will, damit ſie nicht zerfallen im abſchütlen. Von diſen Byrlin erliſe die beſten vnd zeitigſten die nit wurmſtichig ſeind, ſchöle ſie dünn mit einem ſcharpffen meſſerlin, mache ein Sirop von gůtem weiſſem Zucker der klar vnd rein ſey, ſeüd jn wol, zůletſt lege deine Byrlin darein, vnd ſeüd dañ den Zucker zů rechter dicke, etliche ſtröuwen ein wenig Zimmet, der rein geſtoſſen iſt, in diſen Sirop, das magſtu auch thůn. Diſe Muſcateller byrlin alſo eingemacht, ſeind faſt lieblich den geſunden des abents nach eſſens, den magen damit zůbeſchlieſſen, werden auch den ſiechen geben für ein labung, denen alle ſpeiß widerwertig vnnd entgegen iſt. So du aber diſe Muſcateller byrlin nicht hetteſt, oder vberkommen köndteſt, magſtu wol ein andere art von Biren, die lind, milde vnd wolgeſchmackt ſeind, auff diſe weiß einmachẽ. Weren ſie aber zůgroß, in vierteil ſchneiden, vnnd den Sirop mit Zimmet beſpꝛengen, vmb lieblichers geruchs willen. Solche biren ſeind dem magen auch faſt angenäm, alſo eingemacht, wiewol ſie jhm rohe faſt ſchädlich ſeind, werden ſie voꝛ der ſpeiß gebꝛaucht, ſo verſtopffen ſie den bauch, ſeind den krancken auch labhafft.