Krafftbrot oder Marzipan aus gestoßenen Mandeln und Zucker

Von krafftbꝛot oder Marzapan. DAs diſe krafftbꝛot od' Marzapan von den Welſchen, ſampt der gantzen Apotecken, in vnſer landt bꝛacht ſeind, zeiget der nam̃ an, ſeind trefflich wolſchmeckẽde küchlin oder fladen, die krancken, welchẽ alle ſpeiß zůwider iſt, darmit auffzůhalten, dann ſie füren vnd nehꝛen den leib trefflich wol, ſeind auch anmůtig, ſüß vnd lieblich am geſchmack, darumb ſie von den Apo- teckern den reichen leüten zů den pancketen, gaſtungen vnd ſchlafftrüncken, bereyt werden, da ſie mehꝛ zů vnnutz vnnd einem vberfluß, dann zů der artzney, als ſie erſtmals erdacht ſeind, gleich wie andere gůtte Confect, Latwergen vnnd einmachungen, üppigklichen verſchwendet werden. Man pflegt ſie alſo zůmachen, Nim̃ der friſcheſten gůten ſüſſen Mandlen, ſchütt ſie inn ein ſiedends auffwallends waſſer, heb ſie ſchnell vom feür, ſo laſſen ſie die haut, zeühe ſie ab, legs inn ein friſches kalt waſſer, das ſie nit ölig werden, ſtoß ſie reyn inn einem ſaubern möꝛſer, als klein du kanſt, du ſolt aber jhe vnderweilen ein tröpflin Roſenwaſſer daran gieſſen, darmit ſie, wie geſagt iſt, nit feißt oder ölig werden. Wann du ſie dañ vaſt klein geſtoſſen haſt, ſo wige ſie ab, vnnd thůe als ſchwär gůtes weiſſes zuckers darzů, oder etwas mehꝛ, der auch reyn geſtoſſen ſey, ſtoß die zwey ſtuck im möꝛſer wol durch einander, ſo würt ein ſchöner weiſſer teyg darauß, den ſtreich auff oblaten in ein runds reifflin, als dick vñ als bꝛeyt du ſolche Marzapan, krafftbꝛot, oder flädlin haben wilt. Dañ ſo leg ſie in ein darzů gemachte küpfferin oder jꝛdin fladen pfann, mit einem deckel, mach ein vaſt lind feür darunder, vnd darauff, laß es gemächlich bachen vnnd trücknen, hab gůt ſoꝛg das du es nit verbꝛenneſt.