Quittenlatwerge aus dem Mark, mit Honig oder Zucker

Mancherley art, ſchöne vnd gůte Kütten Latwerg zůmachen. QVitten iſt ein faſt ſchöne frucht, vñ winter obs, eins ſtarcken lieblichen geruchs, herbes geſchmacks, rohe zůeſſen vntauglich, würt aber zů vilerley ſpeiß vnd artzney gebꝛaucht, vil mehꝛ dann kein ander obs. Werden in vilerley geſchlecht vnderſcheiden, nach mancherley landt art, impffung oder pflantzung, bey vns werden gewonlich zweyerley geſchlecht gefunden, als knoꝛrechtige, knöpffige kleine Quitten, faſt rauhe, herb vnd ſteinig, vnd etwas gröſſer, milter, zarter vnd geſchlachter, welche für die beſten, wann ſie wol zeytig ſeind, zů der artzney einzůmachen, oder Latwergen gebꝛaucht werden ſollen. Auß diſen Quitten, wiewol ſie faſt in den Apotecken vñ zů mancherley ſtücken gebꝛaucht werden, wöllen wir in diſem erſten theyl vnnd vnderſcheidt allein von der Latwergen ſagen, welche gemeinlichen alſo bereit würt. Man ſoll nem̃en diſer ſchönen wolriechenden Quitten, die recht zeitig ſeind, vnnd durch einhin gelb, die ſelben ſchölen vnd ſeübern von den innwendigen kernen, butzen vnd ſteinlin (die kernen ſollen auch ſonderlich verwaret werden) vnd dann in ein verglaſurten hafen thůn, vnnd mit gůtem ſtarckem wein zů einem můß ſieden laſſen, wiewol etliche den ſafft anderer Quitten darzů bꝛauchen, ettliche allein rohe waſſer, etliche verſpꝛeiſſen die Quitten mit höltzlin in ein Hafen, das ſie nit herauß fallen mögen, vnd vberſtürtzen den ſelbigen Hafen auff ein andern, der halb voll ſiedens waſſers iſt, laſſen ſie auch alſo von dem dampff des vnderſten waſſers zů einem můß werden, aber daran iſt nit groß gelegen, mag ein jeder ſolchs zůwegen bringen nach ſeinem gůtduncken. Wann ſich nůn die Quitten gantz ergeben haben, weich vnnd můſecht woꝛden ſeind, ſoll man ſie alſo heiß durch ein härin ſib ſchlagen vnd durchtreiben, alſo, daß das marck allein dardurch gang auff das reineſt, wañ du die Latwerg gern ſchön haben wolteſt, vnd von den kernlin, heütlin vñ ſteinlin abſöndern. Etliche treiben ſolchs durch ein härin tůch, etliche durch ein ander ſchlecht tůch, aber meines bedunckens iſt diſe weiſe am beſten. Wiltu nůn diſe Latwerg von Honig machen, ſo můſtu diſes marck der Quitten abwägen, vnnd ſouil gůts geleüterts Honigs, dz wol verſchaumpt iſt, darzů thůn, minder oder mehꝛ, darnach du ſolche Latwerg krefftig vnnd gůt am geſchmack, gern ſüß haben wilt. Deßgleichen auch, ſo du ſie von Zucker haben wilt, die vil lieblicher, anmůtiger, vñ wolgeſchmackter iſt, můſtu ſouil clarificierten oder gereynigten Zucker darzů nem̃en, vnd alſo das marck mit dem Zucker vnd Honig auff ein ſittig kolfeür ſetzen, vnd gemächlich ſieden laſſen, vnd mit gantzem fleiß ſtätigs rüren, darmit es nit anbꝛeñ, vñ alſo lang gemächlich vnd ſittiglich ſieden laſſen, biß es dick gnůg würt, das kanſtu alſo mercken, wañ es ſich leichtlich laßt abſchölen von der pfannen oder beckin, oder magſt ſolchs auch pꝛobieren auff einem kalten eiſen, oder einem boden von einem möꝛſer, wañ ſie in rechter dicke iſt, vnd ſich wol abſchölet, ſo haſt du ein gůte krefftige Quitten latwerg, die magſtu in ſchöne neüwe Zuckerlädlin gieſſen, oder auff einem bꝛeyten teller mit friſchem ſüſſem mandelöl beſtrichen, erkalten laſſen, vñ nach deinem gefallen zů ſtücklin ſchneidẽ. Wiltu aber diſe Latwergen noch krefftiger haben, magſtu wol (als dañ ſolches auch in dẽ Apotecken bꝛauchet vnnd gemacht würt) diſes gewürtz darein thůn. Nim̃ weiſſen gůten Jngber, der nicht wurmſtichig, ſchwartz vñ hart ſey iiij. lot, gůten außgebißnẽ ſcharpffen Zimmet ij. lot, außerleſene Näglin, ſchwäre gůte Muſcatnuß, Muſcaten blůet, jedes ein lot, Gallangen anderhalb lot, Cubeblin, Cardomẽlin, langen Pfeffer jedes ein quintlin, diſe ſtück ſtoß rein zů puluer, vñ nim̃ daruon zů einem pfund ein lot oder zwey, nach dem du ſolche Latwerg gern ſtarck vnd wol gewürtzt haſt. Wiltu auch das ſolche Latwerg hefftig treibe, vnnd ein purgierende Latwerg oder laxatiff werde, magſtu wol auff ein pfundt ein lot bereyter Scamonea inn der Apoteck, Diagridium genañt, am letſten wann du die Latwerg vom feür heben wilt, vermiſchen, vnd dann auff einem kalten ſtein oder teller geſchmiert, wie oben geſagt iſt, erkalten laſſen, vnd ſtücklin ſchneiden, welche du in Wein zertreiben ſolt, wann du ſie zů ſtůlgängen bꝛauchen wilt. Die Alten haben diſe Latwerg in groſſem bꝛauch gehabt, vnd mit mancherley ſtücken vermiſchet, welches bey vnſern zeyten gantz abkommen, vnd nit mehꝛ im bꝛauch iſt.