Grünes Reismus mit Mandelmilch, in Schmalz oder im Mörser gebacken

Ein gut Eſſen von Mandeln. KOche Reiß inn einer Milch oder waſſer faſt wol, treibs dann durch mit Mandelmilch, die faſt gut, vnd zuvor wol dick gewaͤlt iſt, nimb darnach Binaͤtſch oder Mangolt, deß gar gruͤnen, oder Petterlein, waſch, ſchwing das waſſer wol darvon, darnach ſo ſtampffe es wol, trucke den ſafft darvon auß, ruͤhr jhn durch den vndergetriebnen Reiß, biß er gruͤn wirt: auch eyer vnnd Mandelmilch, daß inn der dicke iſt wie ein ſtraubenteig, mach ein heiſſes ſchmaltz, wann du es mit waſſer bereitet haſt, ſo ſchuͤtte es darein, ſaltz es ein wenig, richt es an, beſtrewe es wol mit Roſinlein, oder mach ein moͤrſelheiß (ichhab vorgemeldet, etliche laſſen jhnen haͤfelein machen, die ſind vnden vnd oben gleicher weite, wol verglaſiert, alſo, daß ſie ſchoͤn glat ſind, vnd an dem boden haben ſie drey fuͤßlein, welche ſolche ſachen gar fein geben) es ſey aber gleich was es woͤlle, ſo mache es heiß, beſtreich es mit ſchmaltz, thu es darein, bache es, wie du zuvor oben auch gelehret biſt: Wiltu dann ſo zeuch es aller dings an, ohn allein die gruͤne farb halbiere, vnd faͤrbe das eine theil, das ander laß wie es iſt: darnach thu deſſen ein theil in einen moͤrſel oder hafen, wie du es haſt, thu ein ſtuͤrtz oder deckel mit ein wenig glut daruͤber, daß es geſtehet, aber doch nicht braun werde, beſtrew es dann mit Weinbeer vnnd Meer draͤublein, vnd thu diſer farb auch ſo vil alß zuvor darein, thu jm wie anfangs, vnnd alſo durchauß, biß du es alles eingeſetzt haſt, alßdann gib jhn vndenauff wol kohlen, oben nur ein heiſſe aſchen, bachs daß es vberall braun werde, mit duͤnnem ranfft. Der moͤrſel, hafen oder kachel, worin du es machſt, ſol nicht vil uͤber halb voll ſeyn, dann es gehet ſchoͤn auff. Wann es gebachen, ſo thu es hoͤfflich herauß. Wiltu es nicht alſo trucken haben, ſo mach eine bruͤh von Zucker, Roſenwaſſer vnnd brot daruͤber.