Hollopotrida: gekochte und gebratene Fleisch-, Geflügel- und Wildstücke mit Gemüse in Brühe

Hollopotrida zu machen, mit aller Zugehoͤrung. 1. RJndtfleisch in einer Bruͤh abgesotten, biß gar ist, doch dz nit versotten, auß der Bruͤh außgezogen, vñ kalt lassen werden, vnd die Bruͤh auffgehaben, vnd sauber zugedeckt. 2. Schweinenfleisch zugericht in einem Wasser, vñ gar an die statt gesotten, zeuchs auß der Bruͤh, vnd laß kalt werden. 3. Ruckgradt vom Schwein, wol gesotten auß der Bruͤh gezogen, vñ kalt lassen werden. 4. Den Schwantz vom Schwein gesotten, vnd kalt lassen werden. 5. Schweinen Ohren gar gesotten. 6. Die Wuͤrst auch gebraten. 7. Seudt die Leberwuͤrst, vnd schaw, daß du sie nicht verseudest, zeuch sie auff ein Bret, vnd laß sie kalt werden. 8. Zirwonada auff Welsch gemacht, gesotten, vnd kalt lassen werden. 9. Gebraten Kappaunen. 10. Gesotten Kappaunen, der nur halb gesotten, heb die Bruͤh darvon auff, denn man braucht sie mit der Rindtfleischbruͤh. 11. Gebraten Rephuͤnner oder Feldthuͤnner. 12. Gesotten Rephuͤnner, die halb gar seindt. 13. Haselhuͤnner nicht gar an die statt gebraten. 14. Gesotten Haselhuͤnner, die halb gar seindt. 15. Fasan der halb gebraten. 16. Fasan der halb gesotten. 17. Hattele vom Kalbfleisch, halb gebraten. 18. Hattele vom Rindtfleisch gar gebraten. 19. Kaͤlbernwuͤrst halb gebraten. 20. Geraͤuchert Rindtfleisch, das nicht gar versotten. 21. Geraͤuchert Kalbfleisch, das man nicht starck leßt auffsieden, vnnd kalt leßt werden. 22. Geraͤucherte Hennen, die nicht gar gesotten sind. 23. Gaͤnß die nicht gar gebraten. 24. Enten die halb gebraten. 25. Gesotten Enten. 26. Gebraten Kramatsvoͤgel, die nicht verbraten. 27. Allerley klein Voͤgel gebraten. 28. Gesotten klein Voͤgel. 29. Gesotten Kramatsvoͤgel. 30. Knorren von Kalbfleisch, die nicht versotten. 31. Gesotten Castraun oder Hammelfleisch. 32. Gebraten Castraun oder Hammelfleisch, das gar ist. 33. Kuttelfleck oder Suͤltzen, die gar gesotten seyn, daß man sie zerschneidt, an ein Spieß steckt, vnd braͤt, sonderlich wenn sie sauber vnd zugericht seyn, daß sie nicht nach der Herberg schmecken. 34. Gelb Ruben fein grob geschnitten, vnnd in gesottenem Wasser gequellt, vnd kalt lassen werden. 35. Spenat geklaubt, ein wenig gequellt, vnnd auß dem Wasser außgedruckt. 36. Weisse Stickelruben sauber geschelet, gequellt vnd außgekuͤlt. 37. Gebraten Hasen, die nicht gar seindt. 38. Weisse Wasserruben grob geschnitten, vnd in Wasser gequellt. 39. Gebratene Aurhanen, die nicht gar gebraten. 40. Gebraten Jndianischer Han, der auch nicht gar gebraten ist. 41. Gebraten Birckhan, oder Birckhenn. 42. Gesotten Birckhan. 43. Gebraten Drappen. 44. Gesotten Drappen. 45. Gebraten junge Huͤner, die im Safft gebraten. 46. Gesotten junge Huͤner. 47. Braten von einem Hirsch, nicht verbraten. 48. Braten von einem Reh, im Safft gebraten. 49. Schweine Braten, die nicht verbraten. 50. Pettersilgen Wurtzel geschabt, gequellt, vñ voneinander geschnitẽ. 51. Allerley wolschmeckende Kraͤuter gehackt, vnd darvnter gethan. 52. Auch ein wenig Knobloch. 53. Origanum Kraut. 54. Gerieben Parmesankaͤß. 55. Gerieben Ruckenbrot. 56. Geraͤuchert Schweinen Fleisch, das nicht versotten. 57. Weiß Kopffel Kraut, das gequellt ist. 58. Weiß Kopffel Salat auch gequellt. 59. Hirschen Ohren, die außgesaͤubert, vnd an die statt gesotten seyn. 60. Laͤmmernfuͤß auch nicht gar gesotten. 61. Castraun oder Hammelsfuͤß, die nicht gar seyn. 62. Kaͤlbernfuͤß die geraͤuchert, vnd nicht versotten. 63. Ochsenfuͤß die nicht versotten. 64. Geselcht Lambfleisch, das nicht versotten. 65. Gesotten Lambfleisch, das nicht gar ist. 66. Geraͤuchert Geißfleisch. 67. Gesotten Geißfleisch. 68. Gantzen Pfeffer. 69. Muscatenbluͤt. 70. Gestossen Pfeffer. 71. Jngwer. 72. Saffran, vnter das geriebene Brot vnd Parmesankaͤß gemengt, zwischen die Speiß gestraͤwt. 73. Rindern Lungenbraten. 74. Gebraten Braten von Gemßen. 75. Braten von einem Steinbock. 76. Gebraten Murmentel. 77. Gesotten Murmentel. 78. Gebratene Duckenten. 79. Gesotten Schnepffen. 80. Gebraten Schnepffen. 81. Gesotten Spenfaͤrckel. 82. Gebraten Spenfaͤrckel. 83. Gebraten Kuͤniglein. 84. Geraͤuchert Ochsenzungen. 85. KuͤhEuter, wenns gesottẽ ist, so schneidt mans fein breit, legts auff ein Roßt, vnd breunt es sauber ab. 86. Schweinenfuͤß vñ Ohren, es sey võ zamen oder wildẽ Schweinẽ. 87. Gruͤn Koͤl der vberquellt ist. 88. Pastenackwurtzel geschabt vnd gequellt. 89. KoͤlRuben grob geschnitten, vnd gequellt. 90. Pertrumkraut. Nim̃ ein breiten vberzindten Fischkessel, vnnd richt das Kraͤuterwerck vnd Fleischwerck, es sey gebratẽ oder gesotten, wie zuvor beschrieben ist, fein eyn nacheinander, zettelweiß, daß man gebratens vnd gesottens durcheinander mengt, gruͤne Kraͤuter, die klein gehackt seyn, gerieben Brot, vñ Parmesankeß, den Knobloch, der klein geschnitten ist, vnnd das Gewuͤrtz, so jetzt bemelt durcheinander gemengt, daß nicht alles vber ein hauffen kompt. Vnd wenns eyngericht ist, so nim̃ die Rindtfleisch, Heñen vnd Kappaunenbruͤh, die fein lindt gesaltzen, seig sie daruͤber durch ein Haͤrin Tuch. Nim̃ auch ein eyngebrennt Mehl darein, setz es auff Kolen, doch auff kein brennendt Feuwer, daß es nicht anbrennt, vnnd schaw, daß du es nicht versieden leßt, daß du ein jeglich stuͤck auff ein Schuͤssel besonder kanst anrichten. Denn solche Speiß kan man nicht lang sieden, weil sie vorhin fast gar ist. Vnd ein solche Speiß kanstu auff zehen oder zwoͤlff Tisch zurichten, oder wol nur auff ein Tisch. Vnnd muß sich ein Koch flugs tummeln, daß er diesen Zeug allen zusammen bringt. Wer es auch wil zurichten, der muß es zween oder drey Tage zuvor anfahen, daß er alles zusammen bringt, vnnd sauber zuricht, das wolgeschmack, vnd nicht versaltzen wirt. Darumb nennet man es Hollopotrida, daß vielerley zusammen kompt, vnd ist gut fuͤr Koͤnig vnd Keyser, fuͤr Fuͤrsten vnd Herrn zu geben.